Чынара – ktmedia.kg

Садыр Жапаров Түркияга иш сапар менен барат

Чынара — Wed, 28 Oct 2026 11:01:07 +0000

Президент Садыр Жапаров Түркияга иш сапар менен барат\n\nКыргыз Республикасынын Президенти Садыр Жапаров Түркия Республикасынын Президенти Режеп Тайып Эрдогандын чакыруусу менен 29–30-октябрда Анкара шаарына иш сапар менен барат.\n\nСапардын жүрүшүндө Президент Садыр Жапаров Түрк мамлекеттер уюмунун (ТМУ) мамлекет башчыларынын 13-саммитине катышат.\n\nСаммиттин алкагында аймактык жана эл аралык күн тартибиндеги актуалдуу маселелер талкууланат.\nСаммиттин жыйынтыгы боюнча Түрк мамлекеттер уюмунун мамлекет башчыларынын Анкара декларациясына жана катышуучу мамлекеттердин ортосундагы кызматташтыкты мындан ары чыңдоого багытталган башка документтерге кол коюу пландалууда.\n\n**** "}">Садыр Жапаров Түркия Республикасынын Президенти Режеп Тайып Эрдогандын чакыруусу менен 29–30-октябрда Анкара шаарына иш сапар менен барат.

Сапардын жүрүшүндө Президент Садыр Жапаров Түрк мамлекеттер уюмунун (ТМУ) мамлекет башчыларынын 13-саммитине катышат.

Саммиттин алкагында аймактык жана эл аралык күн тартибиндеги актуалдуу маселелер талкууланат.
Саммиттин жыйынтыгы боюнча Түрк мамлекеттер уюмунун мамлекет башчыларынын Анкара декларациясына жана катышуучу мамлекеттердин ортосундагы кызматташтыкты мындан ары чыңдоого багытталган башка документтерге кол коюу пландалууда.

****

Кыргызстанда электр энергиясынын лимитин 5тен 7 кВтка чейин көбөйтүү сунушталды

Чынара — Wed, 28 Oct 2026 09:58:30 +0000

Кыргызстанда алдыдагы күз-кыш мезгилинде бир фазалуу электр тармагына туташкан абоненттер үчүн электр энергиясынын уруксат берилген кубаттуулугу 5 кВт бойдон калат. Ошол эле учурда энергетиктер аны 7 кВтка чейин жогорулатууну сунушташты. Бул тууралуу Бишкек электр тармактары ишканасынын электр энергиясын сатуу бөлүмүнүн башчысы Айгүл Буланова «Биринчи радионун» эфиринде билдирди.

Анын айтымында, учурдагы 5 кВттык чектөө электр энергиясын пайдалануу эрежелеринде жана керектөөчүлөр менен түзүлгөн типтүү келишимдерде белгиленген.

Буланова энергетиктер да уруксат берилген кубаттуулукту жогорулатууну колдоп, тиешелүү сунуш киргизгенин белгиледи. Бирок өзгөртүүлөр кабыл алынмайынча, бир фазалуу туташууда 5 кВттык чектөө күчүндө калат.

Ал эми үч фазалуу электр тармагына туташкан абоненттер үчүн 10 кВт кубаттуулук каралган. Белгиленген лимит жетишсиз болгон керектөөчүлөргө электр коопсуздугунун талаптарын сактоо менен үч фазалуу туташууга өтүү сунушталат.

Электр энергиясы көп керектелген сааттарда кубаттуулукту убактылуу азайтуу маселеси боюнча да азырынча чечим кабыл алына элек. Өткөн жылы жогорку жүктөм учурунда чектөө 3 кВтка чейин төмөндөтүлгөн.

Улуттук электр тармагы ишканасынын маалыматына ылайык, электр энергиясына болгон суроо-талап өсүүдө. 27-октябрда өлкө боюнча электр энергиясын суткалык керектөө 64 млн 318 миң кВт·саатка жетип, өткөн жылдын ушул мезгилине салыштырмалуу 34,4 пайызга көбөйгөн.

Бишкек шаарында жана Чүй облусунда кышка даярдык көрүү боюнча оңдоо иштери аяктаган. Энергетиктер калкты, өзгөчө электр тармагына күч келген маалда, бир учурда көп сандагы кубаттуу электр шаймандарын иштетпөөгө чакырышты.

Ошондой эле Чүй облусунда электр энергиясын эсептөөчү акылдуу эсептегичтерди орнотуу иштери аяктап жатат. Алар энергокомпаниянын эсебинен акысыз орнотулууда.

Электр энергиясынын өчүрүлүшү тууралуу маалыматты «Менин жарыгым» тиркемеси аркылуу алууга болот.

Жарандык авиацияны өнүктүрүү: Амангелдиев Knighthood Global менен кызматташтыкты талкуулады

Чынара — Wed, 28 Oct 2026 09:27:05 +0000

Бүгүн, 28-октябрда Министрлер Кабинетинин Төрагасынын биринчи орун басары Данияр Амангелдиев Knighthood Global консалтингдик компаниясынын төрагасы Джеймс Хоган менен жолугушуу өткөрдү.

Тараптар жарандык авиацияны өнүктүрүү, эл аралык аба каттамдарын кеңейтүү, аэропорттук инфраструктураны модернизациялоо жана улуттук авиаташуучулардын атаандаштыкка жөндөмдүүлүгүн жогорулатуу жаатындагы кызматташуунун келечегин талкуулашты.

Жолугушуунун жыйынтыгында тараптар Кыргызстанда жарандык авиацияны өнүктүрүү боюнча мындан аркы кызматташууга кызыкдар экендиктерин билдиришти.

1 of 4

Кант шаарында параспортчулар үчүн спорттук комплекс курулат

Чынара — Wed, 28 Oct 2026 09:03:10 +0000

Чүй облусунун Кант шаарында параспортчулар үчүн атайын спорттук комплекс куруу пландалууда. Долбоорго Бириккен Араб Эмираттарынан, анын ичинде Дубайдан инвестор тартылат. Бул тууралуу 28-октябрда Дене тарбия жана спорт мамлекеттик агенттигинин директору Улан Асанбаев билдирди.

Анын айтымында, учурда Кыргызстанда паралимпиадалык спорт менен машыккандар үчүн атайын жабдылган спорттук жайлар жок. Комплекс куруу үчүн Кант шаарынан жер тилкеси бөлүнгөн.

«Бизде алар үчүн атайын инфраструктура жок. Келерки жылы Кантта курулуш иштерин баштоону пландап жатабыз. Ал жерден тилке бөлүндү. Дубайдан да демөөрчүлөр бар. Алар менен биргеликте паралимпиадалык комплекс курабыз», — деди Асанбаев.

Жаңы комплексте майыптыгы бар спортчулар паралимпиадалык спорттун түрлөрү менен машыга алышы үчүн бардык шарттар түзүлөт.

Долбоор ишке ашса, Кыргызстанда параспортчулар үчүн атайын курулган ири спорттук жайлардын бири болот.

Кыргызстанда машыктыруучулардын айлыгы 40 миң сомго чейин жогорулады

Чынара — Wed, 28 Oct 2026 08:52:15 +0000

Кыргызстанда спорттук машыктыруучулар менен окутуучулардын айлык акысы үч эседен ашык көбөйдү. Бул тууралуу 28-октябрда «Ачык кабинет» долбоорунун алкагында Дене тарбия жана спорт мамлекеттик агенттигинин директору Урмат Асанбаев билдирди.

Анын айтымында, мурда машыктыруучулар менен окутуучулар айына 12 миң сомдон алышса, азыр алардын айлыгы 35–40 миң сомго жетти. Методисттердин да эмгек акысы жогорулатылды.

Асанбаев белгилегендей, айлык акыны олуттуу жогорулатуу 2026-жылдын 1-январынан тарта жүргүзүлүп, ушул жылдын март айында кошумча индексация болгон.

Ошондой эле өлкөдө спорт тармагын каржылоо көбөйүүдө. Эгерде быйыл бул тармакка 2,5 миллиард сомго жакын каражат бөлүнсө, 2027-жылга бюджеттен 3 миллиард 104 миллион сом каралган.

Бул каражат эмгек акы төлөөгө гана эмес, ижара чыгымдарына, спортчулардын мелдештерге катышуусуна жана спорттук инфраструктураны өнүктүрүүгө да жумшалат.

Мындан тышкары, жаңы спорттук объектилерди курууга 400 миллион сом, ал эми улуттук курама командаларды Олимпиада оюндарына даярдоого 580 миллион сомго жакын каражат бөлүү пландалууда.

Кожомкул атындагы Спорт сарайын реконструкциялоо 2028-жылы аяктайт

Чынара — Wed, 28 Oct 2026 08:48:08 +0000

Бишкектеги Кожомкул атындагы Спорт сарайын жаңылоо учурунда имараттын тарыхый көрүнүшү толук сакталат. Бул тууралуу 28-октябрда «Ачык кабинет» долбоорунун алкагында Дене тарбия жана спорт мамлекеттик агенттигинин директору Урмат Асанбаев билдирди.

Анын айтымында, 2026-жылы башталган долбоорду каржылоону Бишкек мэриясы өзүнө алган. Реконструкциянын алкагында имарат капиталдык оңдоодон өткөрүлүп, сахна комплекси жана көрүүчүлөрдүн отургучтары жаңыланат.

Мындан тышкары, жаңы бассейндер курулуп, футбол, волейбол жана баскетбол сыяктуу командалык спорт түрлөрү үчүн заманбап аянтчалар жабдылат.

Бардык иштерди 2028-жылы аяктоо пландалууда.

Депутаттар Жапониянын Парламентинин Өкүлдөр палатасынын жыйынына катышты

Чынара — Wed, 28 Oct 2026 05:48:27 +0000

Жогорку Кеңештин Төрагасы Марлен Маматалиев баштаган депутаттар Жапонияга жасаган расмий сапарынын алкагында аталган өлкөнүн Парламентинин Өкүлдөр палатасынын жыйынына катышты.

Анда кош палаталуу парламенттин ичинен Өкүлдөр палатасынын ишмердүүлүгү тууралуу кеңири маалыматтар берилип, мыйзам чыгаруу жана өкүлчүлүк кылуу жаатындагы өзгөчөлүктөрү жеринде көрсөтүлдү.

Мындан сырткары, парламенттик талкууларды жүргүзүү жана чечимдерди кабыл алуу жол-жоболору тааныштырылды.

Ошону менен Жогорку Кеңештин делегациясынын Жапониядагы расмий сапары жыйынтыкталды.

Эскерте кетсек, Төрага Марлен Маматалиев баштаган делегациянын курамында депутаттар Талант Мамытов, Талайбек Масабиров, Эльвира Сурабалдиева, Гульнара Акимбаева, Ырысбек Атажанов, Жаныбек Аматов, Мирлан Жеенчороев, Венера Салямова, Умбеталы Кыдыралиев, Рустамбек Советбек уулу, Айсаракан Абдибаева, Токтобүбү Ашымбаева, Бурул Аманова, Джайлообай Нышанов, Джамиля Исаева, Айгүл Карабекова, Карим Ханджеза, Улан Бакасов, Максат Алымбеков, Эрулан Кокулов, Улан Сариев жана Бекмырза Чолпонбай уулу болду.

1 of 2

V Элдик Курултай жөнүндө Жарлыкка өзгөртүүлөр киргизилди

Чынара — Wed, 28 Oct 2026 05:34:15 +0000

Президент Садыр Жапаров Кыргыз Республикасынын Президентинин 2026-жылдын 3-сентябрындагы № 309 «Кезектеги V Элдик Курултайды өткөрүү жөнүндө» Жарлыгына өзгөртүүлөрдү киргизүү тууралуу» Жарлыкка кол койду.

Жарлыкка ылайык, Кыргыз Республикасынын Конституциясынын 71-беренесине ылайык токтом кылынат:

1. Кыргыз Республикасынын Президентинин 2026-жылдын 3-сентябрындагы № 309 «Кезектеги V Элдик Курултайды өткөрүү жөнүндө» Жарлыгына төмөнкүдөй өзгөртүүлөр киргизилсин:

жогоруда аталган Жарлык менен бекитилген Кезектеги V Элдик Курултайды өткөрүү, делегаттарды шайлоо жана координациялоо боюнча уюштуруу комитетинин курамында:

– Чекиров Мамбеткерим Беккелдиевич, Баетов Аяз Батыркулович, Сагынбаев Канат Латипжанович курамдан чыгарылсын;

– Айылчиев Алмаз Асимович – Кыргыз Республикасынын юстиция министри, Имангазиев Алмаз Кулубекович – Кыргыз Республикасынын эмгек, социалдык камсыздоо жана миграция министри, Арабаев Чолпонкул Исаевич – И. Арабаев атындагы Кыргыз мамлекеттик университетинин Юридикалык институтунун юриспруденция кафедрасынын башчысы, академик, юридика илимдеринин доктору, профессор, Кайыпов Сулайман Турдуевич – Кыргыз Республикасынын Президентине караштуу Кыргыз Республикасынын Улуттук илимдер академиясынын академик А.А. Алтмышбаев атындагы Философия институтунун cоциалдык философия бөлүмүнүн башчысы, тарых илимдеринин доктору, профессор курамга киргизилсин.

Борбор калаада бүгүндөн тарта жылуулук бериле баштайт

Чынара — Wed, 28 Oct 2026 04:14:51 +0000

Бүгүн, 28-октябрдан тарта Бишкекте жылытуу мезгили башталат. Бул тууралуу шаардык мэриядан билдиришти.

Маалыматка ылайык, мындай чечим абанын температурасынын төмөндөшүн, Гидрометеорологиялык кызматтын аба ырайы боюнча болжолун жана турак үйлөр менен социалдык объектилерди жылытуу үчүн электр энергиясын керектөөнүн көбөйүшүн эске алуу менен кабыл алынган.

Калаа бийлиги жылуулук берүү системасын ишке киргизүү учурунда жаралышы мүмкүн болгон убактылуу ыңгайсыздыктарга түшүнүү менен мамиле кылууну өтүнөт.

Эске салсак, белгиленген критерийлерге ылайык, тышкы абанын орточо суткалык температурасы беш күн катары менен +8 °Cден жана андан төмөн болгон учурда жылытуу мезгили башталат.

“Коррупцияга жол жок!” — ИИМ маалыматтык челлендж баштады

Чынара — Tue, 27 Oct 2026 10:45:28 +0000

Ички иштер министрлиги «Коррупцияга жол жок!» аттуу маалыматтык челлендж баштады. Демилге 2025–2030-жылдарга Кыргыз Республикасында коррупцияга каршы аракеттенүү боюнча мамлекеттик стратегиянын алкагында уюштурулду.

ИИМдин маалыматына ылайык, челлендждин максаты — коррупцияга каршы күрөштүн маанилүүлүгүн коомчулукка жеткирүү, жарандардын укуктук жана антикоррупциялык маданиятын жогорулатуу, ошондой эле коррупцияга каршы коомдук позицияны бекемдөө.

Иш-чаранын алкагында эстафеталык вымпел министрликтин башкы башкармалыктары жана ички иштер органдарынын бөлүмдөрүнүн ортосунда өткөрүлүп берилет.

Министрлик жарандарды жана мамлекеттик органдарды коррупцияга каршы күрөшкө активдүү катышууга, мыйзамдуулукту сактоого жана коррупциялык көрүнүштөргө жол бербөөгө чакырды.