Казакстандык окумуштуулар кыргыздын мамлекеттик ишмери Жусуп Абдрахмановдун эстелигин Алматы же Астана шаарларынын бирине орнотууну сунушташты.
Маданият, маалымат жана жаштар саясаты министрлигинин маалыматына караганда, бул демилге 17-ноябрда Алматы шаарындагы Аль-Фараби атындагы Казак улуттук университетинде өткөн илимий конференцияда көтөрүлдү.
Жыйында Жусуп Абдрахмановдун 1932-жылдагы ачарчылык маалында Казакстандан Кыргызстанга баш калкалап келген жүз миңдеген адамдын өмүрүн сактап калууга кошкон салымы белгиленди.
Казакстандык окумуштуулар анын тарыхый эмгегин татыктуу баалоо жана кыргыз-казак достугун даңазалоо максатында эстелик орнотуу сунушун эки өлкөнүн жетекчилигине жеткирүү аракеттери жүрүп жатканын билдиришти.
Ошондой эле конференциянын алкагында тарых илимдеринин доктору, «Ата-Бейит» тарыхый-мемориалдык комплексинин директору Болотбек Жумашевич Абдрахмановго саясий репрессиялардын тарыхын изилдөөгө кошкон салымы үчүн Казакстан Көркөм академиясынын атайын диплому жана алтын медалы тапшырылды.

