Дүйнөлүк мунай рыногунда баалар төмөндөөдө. Эл аралык эталон болуп саналган Brent үлгүсүндөгү мунайдын баасы март айынан бери алгачкы жолу бир баррели үчүн 80 доллардан төмөн түштү. Буга АКШ менен Ирандын ортосунда жетишилген убактылуу тынчтык келишими жана Ормуз кысыгы жакынкы күндөрү кайра ачылат деген күтүүлөр себеп болууда.
Рынок катышуучулары Перс булуңундагы негизги энергетикалык каттамдардын кайра иштей башташына ишеним артып, мунай жана газ жеткирүүдө узак мөөнөттүү үзгүлтүктөр болбойт деген үмүт күчөдү.
Ормуз кысыгы дүйнөдөгү эң маанилүү деңиз жолдорунун бири болуп саналат. Ал аркылуу дүйнөлүк мунай жана суюлтулган жаратылыш газын экспорттоонун олуттуу бөлүгү ташылат. Иран менен болгон жаңжалдан кийин кысыктын жабылышы дүйнөлүк энергетикалык рынокко олуттуу таасир тийгизип, Brent мунайынын баасын бир учурда баррелине дээрлик 120 долларга чейин жеткирген.
АКШ президенти Дональд Трамп Ормуз кысыгы ушул жуманын аягына чейин толугу менен ачылып, кемелерден транзиттик төлөм алынбай турганын билдирген.
Акыркы маалыматтар боюнча, Brent мунайынын августтагы фьючерстери бир баррели үчүн 78,37 доллардан, ал эми америкалык WTI мунайы 75,45 доллардан соодаланууда. Ошол эле учурда Европада жаратылыш газынын баасы да төмөндөп, бир мегаватт-саат үчүн 42 евродон төмөн түштү.
Эл аралык энергетикалык агенттиктин (IEA) маалыматына ылайык, Ирандагы согуш жана Ормуз кысыгынын иш жүзүндө жабылышы дүйнөлүк мунай рыногунун тарыхындагы эң ири жеткирүү үзгүлтүктөрүнүн бирине айланган.
