Президент Садыр Жапаров бүгүн, 31-августта, VI Дүйнөлүк көчмөндөр оюндарынын ачылыш аземине катышуу үчүн Кыргызстанга келген АКШнын Түштүк жана Борбордук Азия иштери боюнча атайын өкүлү, АКШнын Индиядагы элчиси Серджио Горду кабыл алды.
Жолугушууда кыргыз-америка мамилелерин мындан ары өнүктүрүү, саясий диалогду чыңдоо, соода-экономикалык жана инвестициялык кызматташтыкты кеңейтүү маселелери талкууланды.
Тараптар «Борбордук Азия + АКШ» (С5+1) форматынын алкагындагы кызматташтыкка өзгөчө көңүл буруп, 2027-жылы бул форматта мамлекет башчыларынын экинчи саммитин өткөрүү мүмкүнчүлүгүн карашты.
Садыр Жапаров Кыргызстандын 2027–2028-жылдарга БУУнун Коопсуздук Кеңешинин туруктуу эмес мүчөсү болуп шайланышына байланыштуу куттуктоосу үчүн Серджио Горго ыраазычылык билдирди.
Ошондой эле экономикалык байланыштарды кеңейтүүдө жана эки өлкөнүн ишкер чөйрөлөрүнүн ортосундагы кызматташтыкты өнүктүрүүдө «В5+1» платформасынын мааниси белгиленди.
Жолугушууда АКШга барууну каалаган кыргызстандыктар үчүн визалык жол-жоболорду жеңилдетүү маселеси да көтөрүлдү. Президент, атап айтканда, визалык депозитти (visa bond) төлөө талабы жана ага байланыштуу чектөөлөрдү кайра карап чыгуу мүмкүнчүлүгүн белгиледи.
Серджио Гор президенттин сунуштарын колдоп, кыргыз-америка мамилелерин мындан ары чыңдоого көмөк көрсөтүүгө даяр экенин билдирди.
Жолугушуунун соңунда Садыр Жапаров АКШнын президенти Дональд Трампка салам жолдоп, VI Дүйнөлүк көчмөндөр оюндарына катышып жаткан америкалык спортчуларга ийгилик каалады.
