10-июлда ушул жайкы эс алуу мезгилиндеги Алматы — Тамчы — Алматы эл аралык багыты боюнча биринчи каттам аткарылды. Бул тууралуу “Кыргызстан аэропорттору” ААК билдирди.
Маалыматка ылайык, мезгилдик каттамдардын ачылышы жайкы туристтик мезгилде Казакстан менен Ысык-Көлдүн жээгинин ортосунда түз аба каттамын камсыздайт.
“Кыргызстан аэропорттору” ААК “Ысык-Көл” эл аралык аба майданында биринчи каттамдын жүргүнчүлөрүн салтанаттуу тосуп алды. Конокторду улуттук кыргыз кийимин кийген бийкечтер тосуп алып, кыргыз элинин салттуу меймандостугунун өзгөчө маанайын тартуулашты.
Тамчы — Алматы — Тамчы багыты боюнча каттамдар сентябрь айына чейин аптасына эки жолу аткарылат: дүйшөмбү жана жума күндөрү.
