“Манас” эл аралык аэропортундагы радиомаяктык конуу системасын тейлөө үчүн жаңы имарат курулат. Бул максатта “Кыргызаэронавигация” мамлекеттик ишканасы курулуш иштерине тендер жарыялады.
Мамлекеттик сатып алуулар порталындагы маалыматка ылайык, долбоордун жалпы баасы 9,37 миллион сомду түзөт.
Техникалык тапшырмага ылайык, эки кабаттуу имарат энергияны үнөмдөөчү СИП-панелдерден курулуп, жалпы аянты 147,4 чарчы метр болот.
Долбоор “ачкыч тапшыруу” принциби менен ишке ашырылат. Анын алкагында инженердик тармактар, электр менен камсыздоо, жерге туташтыруу жана чагылгандан коргоо тутумдары, жылытуу, желдетүү, суу менен камсыздоо жана канализация орнотулат. Мындан тышкары, видеокөзөмөл, өрт жана күзөт сигнализациясы, ошондой эле кирүүнү көзөмөлдөө системаларын туташтыруу мүмкүнчүлүгү каралган.
Курулуш иштерин келишим түзүлгөндөн кийин 90 календардык күндүн ичинде бүтүрүү пландалууда.
