Кыргызстандын “Кара. Кызыл. Сары” тасмасы Шанхай кызматташтык уюмуна мүчө мамлекеттердин биринчи Эл аралык кинофестивалында башкы сыйлыкка ээ болду.
Фестивалдын жабылыш аземинде Гран-принин ээси Кыргызстандын маданият, маалымат жана жаштар саясаты министри Мирбек Мамбеталиев тарабынан жарыяланды.
Министр кинофестивалдын жыйынтыгын чыгарып жатып, Кыргызстанда мындай деңгээлдеги эл аралык кинофорумдун биринчи жолу өтүп жатканын белгиледи.
“Бир нече күндүн ичинде биз таланттуу жана мазмундуу тасмаларды көрүп, жаңы ысымдар менен тааныштык. Кино искусствосу чек арага карабай, ар түрдүү маданияттагы адамдарды бириктире аларын дагы бир ирет далилдеди”, — деди Мирбек Мамбеталиев.
Эл аралык калыстар тобунун чечими менен башкы сыйлык “Кыргызфильм” киностудиясы тарткан “Кара. Кызыл. Сары” тасмасына ыйгарылды.
Кыргыз тасмасынын жеңиши фестивалдын жабылышындагы негизги окуялардын бири болуп, залда узакка созулган кол чабуулар менен коштолду.
ШКУ өлкөлөрүнүн биринчи Эл аралык кинофестивалы Ысык-Көлдүн жээгинде 16–19-июль күндөрү өттү. Ага уюмга мүчө сегиз мамлекеттин кинематографисттери катышып, чыгармачыл жолугушуулар, тасма көрсөтүүлөр жана кесиптик талкуулар уюштурулду.
