Эл аралык футбол федерациясы (FIFA) 2026-жылкы дүйнө чемпионатынын жыйынтыгында рекорддук көрсөткүчкө жетип, акыркы төрт жылдык цикл ичинде 15 миллиард доллардан ашык киреше тапты. Бул тууралуу уюмдун расмий отчетунда айтылат.
Маалыматка ылайык, 2023–2026-жылдарды камтыган циклде FIFAнын кирешеси мурунку төрт жылдык мезгилге салыштырмалуу дээрлик эки эсеге көбөйгөн. Тактап айтканда, 2019–2022-жылдары уюмдун кирешеси 7,57 миллиард долларды түзгөн.
FIFAнын президенти Джанни Инфантино бул дүйнө чемпионаты футболду өнүктүрүү үчүн жаңы мүмкүнчүлүктөрдү ачканын белгиледи. Анын айтымында, уюм мындан ары да футболдун дүйнөлүк деңгээлдеги коммерциялык мүмкүнчүлүктөрүн кеңейтүүгө багытталган иштерди улантат.
FIFAнын кирешесинин өсүшүнө негизги салым кошкон багыттардын бири — беттештерге билеттерди сатуу системасы болду. Уюм бул операциялардан сатып алуучудан да, сатуучудан да 15 пайыздык комиссия алат.
Мындан тышкары, атайын конокторду тейлөө жана премиум кызматтар да кирешенин маанилүү булагы болгон.
Дүйнө чемпионатынын коммерциялык ийгилигинен кийин турнирге катышуучу командалардын санын дагы көбөйтүү маселеси кайрадан талкууга чыкты. Быйылкы чемпионатта 48 курама команда катышса, келечекте бул санды 64 командага чейин жеткирүү мүмкүнчүлүгү каралууда.
