Бишкек шаарына караштуу Жал айылында көчө жарыгын орнотуу иштери аяктады. Бул тууралуу Бишкек мэриясы билдирди.
Маалыматка ылайык, “Бишкекжарык” муниципалдык ишканасы тарабынан айланма жолдон Жал айылына чейинки 4 чакырымдан ашык унаа жолуна тышкы жарыктандыруу орнотулду. Бул тилке буга чейин жарыктандырылган эмес.
Долбоордун алкагында 96 жарыктандыруу мамысы орнотулуп, 152 заманбап LED чырагы коюлду. Ошондой эле 6 миң метрден ашык кабелдик линия тартылды.
Мындан тышкары, айылдын ички көчөлөрү да жарыктандырылды. Алардын катарында Орок көчөсүнөн Бакен-Ата көчөсүнө чейинки тилке, Нияз-Ата, Аланов Сатке жана Гагарин көчөлөрү бар.
Мэриянын маалыматына караганда, жаңы жарыктандыруу түнкү убакта жол кыймылынын коопсуздугун жакшыртып, айыл тургундары үчүн ыңгайлуу шарт түзүүгө багытталган.
