Бишкек шаарында Дүйнөлүк көчмөндөр оюндарынын ачылыш аземи жана Шанхай кызматташтык уюмунун саммитине байланыштуу шаар тургундары жана коноктору үчүн 11 фан-зона уюштурулат.
Негизги фан-зона борбордук Ала-Тоо аянтында жайгашып, анда иш-чаралардын салтанаттуу ачылышы түз эфирден көрсөтүлөт. Программа башталганга чейин кыргыз эстрадасынын өкүлдөрү жана чыгармачыл топтор катышкан концерттик программа өтөт.
Ошондой эле аянтта фуд-корттор, эс алуу жайлары жана үй-бүлөлөр үчүн атайын аймактар уюштурулат.
Мындан тышкары, Бишкектин төрт районунда дагы 10 фан-зона иштеп, шаар тургундары менен меймандарга Дүйнөлүк көчмөндөр оюндарынын ачылыш аземин жана ШКУ саммитинин негизги иш-чараларын көрүүгө мүмкүнчүлүк түзүлөт.
