7-августта Евразия чыгармачыл гильдиясынын демилгеси жана Буэнос-Айрестеги Юнус Эмре институтунун колдоосу менен “Курманжан Датка. Тоолор ханышасы” көркөм тасмасы Аргентинада биринчи жолу көрсөтүлдү.
Уюштуруучулардын маалыматына ылайык, бул Кыргызстанда тартылган көркөм тасманын Аргентинадагы алгачкы расмий көрсөтүүсү болду. Иш-чара Борбор Азия өлкөлөрүнүн тасмаларын көрсөтүү жана китептерин таанытуу боюнча Латын Америкасында өтө турган эл аралык маданий долбоордун башталышы болуп калды.
Көрсөтүүгө дипломатиялык өкүлчүлүктөрдүн, маданий уюмдардын өкүлдөрү, жазуучулар, кинематографисттер, студенттер жана Евразиянын тарыхына жана маданиятына кызыккан Буэнос-Айрестин тургундары катышты.
Кеченин негизги бөлүгүндө режиссёр Садык Шер-Нияздын кыргыз элинин тарыхындагы көрүнүктүү мамлекеттик ишмер Курманжан Датканын өмүрүнө арналган тасмасы көрсөтүлдү.
Иш-чара ошондой эле 2027-жылдын октябрында Аргентинада биринчи жолу өтө турган 15-Евразиялык ачык китеп форумуна жана адабий фестивалга карата эл аралык маданий долбоордун алкагында уюштурулду.
