Бишкекте Дүйнөлүк көчмөндөр оюндары-2026нын ачылыш аземин жана Шанхай кызматташтык уюмунун саммитинин негизги иш-чараларын түз эфирден көрүүгө мүмкүнчүлүк түзүлөт.
Бул үчүн борбор калаада 13 фан-зона уюштурулуп, алардын негизги аянтчасы Ала-Тоо аянтында жайгашат. Мындан тышкары, фан-зоналар Бишкектин төрт районунда тең иштейт.
Атап айтканда, Октябрь районунда — “Тунгуч-1” скверинде, “Ынтымак-2” паркындагы амфитеатрда жана Д. Асанов атындагы паркта; Ленин районунда — Фучик атындагы паркта, Ак-Өргөдөгү “Ашар” паркында жана Жал кичи районундагы “Муун» скверинде уюштурулат.
Биринчи Май районунда фан-зоналар Ч. Түлөбердиев атындагы паркта, Токтоналиев көчөсүндөгү спорт комплексинде жана Ак-Босогодогу скверде, ал эми Свердлов районунда “Алга” спорт комплексинде, №66 жана №21 мектептердин аймагында жайгашат.
Бардык аянтчаларда LED-экрандар орнотулуп, алар аркылуу ачылыш аземи жана ШКУ саммитинин негизги иш-чаралары түз эфирде көрсөтүлөт.
Мындан тышкары, фан-зоналарда концерттик программалар, фотозоналар, көргөзмөлөр, фуд-корттор жана эс алуу жайлары уюштурулат. Коноктор тогуз коргоол, чүкө жана беш таш сыяктуу улуттук оюндарга да катыша алышат.
Фан-зоналардын иштөө убактысы тууралуу маалымат иш-чараларга жакынкы күндөрү кошумча жарыяланат.
