Президент Садыр Жапаров Жогорку Кеңештин жыйынында акыркы күндөрү Кыргызстанда өткөн ири эл аралык иш-чаралар өлкөнүн эл аралык аброюн жогорулатып, аймактык жана дүйнөлүк процесстердеги ролун бекемдегенин билдирди.
Кыргызстанда VI Дүйнөлүк көчмөндөр оюндары жогорку деңгээлде өткөрүлүп, өлкө дүйнөлүк саясий, маданий жана спорттук коомчулуктун көңүл борборуна чыкты.
Мамлекет башчысы Кыргызстандын 2025–2026-жылдардагы ШКУдагы төрагалыгы көп тараптуу дипломатия үчүн маанилүү этап болгонун белгиледи. Бул мезгилде коопсуздук, туруктуу өнүгүү, транспорт, соода-экономикалык кызматташтык, энергетика, санариптештирүү жана гуманитардык байланыштар боюнча иштер жүргүзүлгөн.
“Дүйнө Кыргызстанды жаңы деңгээлде жана жаңы сапатта көрө баштады. Өлкөбүзгө болгон кызыгуу жана ишеним өсүүдө”, — деди Жапаров.
Жапаров өлкөнүн мындан аркы өнүгүүсү мыйзам чыгаруу жана аткаруу бийлигинин натыйжалуу кызматташтыгына түздөн-түз байланыштуу экенин белгиледи.
“Кыргызстанды күчтүү экономикасы, өнүккөн заманбап инфраструктурасы бар, жарандарына сапаттуу билим алууга, эмгектенүүгө, ишкердик жүргүзүүгө жана татыктуу жашоого кеңири мүмкүнчүлүк түзгөн мамлекетке айландыруу — ар бирибиздин милдетибиз”, — деди президент.
Ал бул максатка бийликтин бир бутагынын аракети менен жетүү мүмкүн эместигин белгилеп, президент, Жогорку Кеңеш жана Министрлер кабинети өз ара түшүнүшүү жана конструктивдүү кызматташтыкта иш алып барышы керектигин айтты.
Мындан тышкары, мамлекет башчысы парламент менен аткаруу бийлигинин ортосундагы натыйжалуу кызматташтыкты мындан ары да бекемдөө зарылдыгын кошумчалады.
