Борбордук шайлоо комиссиясы президенттикке талапкердин шайлоо фондун түзүү, ага каражаттарды түшүрүү жана чыгымдоо тартибин жөнгө салган жаңы жобону бекитти.
Боршайкомдун маалыматына караганда, аталган документте талапкердин жана аны көрсөткөн саясий партиянын шайлоо фондун түзүү, банкта атайын эсеп ачуу, ошондой эле милдеттүү шайлоо күрөөсүн/төгүмүн төлөө тартиби так аныкталган.
Мындан сырткары, бекитилген жободо төмөнкү эрежелер белгиленди:
Каражаттардын булактары жана чектери: Фондго каражаттардын келип түшүү тартиби жана алардын эң жогорку чеги;
Төлөмдөр жана кайрымдуулук: Финансылык төлөмдөрдү жүргүзүү жана кайрымдуулук кылуучуларды аныктоо тартиби;
Көзөмөл жана отчёттуулук: Ажыратылган каражаттардын максаттуу пайдаланылышын көзөмөлдөө жана талапкерлердин финансылык отчёттуулугун камсыз кылуу талаптары.
Жаңы бекитилген жобо шайлоо өнөктүгүнүн финансылык ачык-айкындуулугун жогорулатууга жана каражаттардын мыйзам чегинде сарпталышын камсыз кылууга багытталган.
