Президент Садыр Жапаров Бенилюкс мамлекеттери менен Кыргыз Республикасынын ортосундагы уруксатсыз кирген же жашап жүргөн адамдарды реадмиссиялоо тууралуу макулдашууну ратификациялоо боюнча мыйзамга кол койду.
Документ 2026-жылдын 22-апрелинде Жогорку Кеңеш тарабынан кабыл алынган.
Макулдашуу 2025-жылдын 18-июнунда Бельгиянын борбору Брюсселде кол коюлган. Ага Бельгия Королдугу, Люксембург Улуу Герцогдугу жана Нидерланд Королдугу кирген Бенилюкс мамлекеттери менен Кыргызстан катышууда.
Мыйзам макулдашууну күчүнө киргизүү үчүн мамлекет ичиндеги жол-жоболорду аткаруу максатында кабыл алынганы белгиленди.
Макулдашуу тараптардын аймагында мыйзамсыз жүргөн адамдарды кабыл алуу жана кайтаруу жол-жоболорун жөнөкөйлөтүүгө багытталган. Ошондой эле чыгарылууга тийиш болгон жарандарды транзит аркылуу өткөрүү жана мыйзамсыз миграцияга каршы күрөшүү боюнча кызматташууну күчөтүүнү карайт.
