2026-жылдагы Эл аралык Booker сыйлыгынын кыска тизмесине дүйнөнүн ар кайсы өлкөлөрүнөн алты чыгарма кирди. Тизмеде колониализм, аял тагдыры, эркиндик, үй-бүлө жана коомдук өзгөрүүлөр тууралуу романдар орун алган.
Талапкерлердин арасында тайвандык жазуучу Ян Шуан-цзынын Taiwan Travelogue романы бар. Чыгарма 1930-жылдардагы Тайвандагы жапон колониялык башкаруу мезгилин сүрөттөп, жапон жазуучусу менен анын тайвандык котормочусунун мамилесин баяндайт.
Ошондой эле болгар жазуучусу Рене Карабаштын She Who Remains романы кыска тизмеге кирди. Анда байыркы салттар өкүм сүргөн албан коомундагы аялдын эркиндик үчүн күрөшү чагылдырылган.
Француз жазуучусу Мари Ндьяйдын The Witch чыгармасы аялдык, энелик жана үй-бүлөлүк кризис темаларын мистикалык өңүттө ачып берет.
Иран революциясынан кийинки окуяларды камтыган Шида Базярдын The Nights Are Quiet In Tehran романы дагы финалисттердин катарына кошулду. Роман бир үй-бүлөнүн төрт муунунун тагдыры аркылуу Ирандагы өзгөрүүлөрдү баяндайт.
Тизмеде ошондой эле немис жазуучусу Даниэль Кельмандын The Director романы жана бразилиялык автор Ана Паула Майянын On Earth As It Is Beneath чыгармасы да бар.
Эл аралык Booker сыйлыгынын жеңүүчүсү 2026-жылдын 19-майында Лондондогу Tate Modern музейинде өтө турган салтанатта жарыяланат.
