Бишкекте муниципалдык автобустарда накталай төлөм алынгандан кийин айдоочулардын айлыгы 30 пайызга жогорулатылат. Бул тууралуу шаардык кеңештин туруктуу комиссиясынын жыйынында вице-мэр Рамиз Алиев билдирди.
Анын айтымында, айдоочулар арасында талаш-тартыштардын жана жол эрежелеринин бузулушунун негизги себептеринин бири накталай төлөмдөн түшкөн кошумча киреше болуп саналат.
“Айдоочулар көбүрөөк жүргүнчү алуу үчүн бири-бирин озуп өтүп, жол кырсыктарына себеп болуп, айрым учурда каттамдан да чыгып кетишет. Ошондуктан автобустарда накталай төлөмдү алып салууну көздөп жатабыз. Мунун ордуна алардын айлыгы 30 пайызга көбөйтүлөт”, — деди Рамиз Алиев.
Эске салсак, Бишкекте муниципалдык автобустарда жол кирени накталай төлөө 2026-жылдын 1-июлунан тартып токтотулат.
