Россиянын Мурманск шаарында эл аралык илимий-билим берүү экспедициясы башталды. Ага дүйнөнүн 22 өлкөсүнөн келген 14 жаштан 16 жашка чейинки окуучулар катышууда. Бул тууралуу Казинформ TV BRICS’ке шилтеме берип жазды.
Катышуучулар атомдук муз жаргыч кеме менен Жердеги эң жетүүгө кыйын аймактардын бири болгон Түндүк уюлга сапар алышты. Он күнгө созула турган экспедиция учурунда өспүрүмдөр Арктикадагы илимий изилдөөлөр менен таанышып, окумуштуулардын ишине күбө болушат жана бир катар тажрыйбаларга катышат.
Экспедицияга Индия, Кытай, Россия жана башка өлкөлөрдүн жаштары катышууда. Ар бир мамлекет өз өкүлүн улуттук тандоо сынагынын жыйынтыгы менен аныктаган.
Индиянын өкүлү Лаки Рават сапар алдында бул саякат алар үчүн өзгөчө мүмкүнчүлүк экенин белгилеп, Түндүк уюлга жеткен саналуу адамдардын катарына кирерин айтты.
Уюштуруучулардын айтымында, долбоор жаштарды илимге, технологияларга жана айлана-чөйрөнү изилдөөгө кызыктырууга багытталган.
