Советтик жана россиялык белгилүү актриса Наталья Аринбасарова Кыргызстанга келип, VI Дүйнөлүк көчмөндөр оюндарынын ардактуу коногу болот.
Актриса кыргызстандык көрүүчүлөргө Чыңгыз Айтматовдун повестинин негизинде тартылган «Биринчи мугалим» тасмасындагы Алтынайдын ролу аркылуу өзгөчө таанымал. Бул образ ага эл аралык атак алып келген.
1966-жылы Венеция кинофестивалында 19 жаштагы Аринбасарова «Биринчи мугалимдеги» ролу үчүн мыкты аял актриса катары Вольпи кубогуна ээ болгон.
Кийин актриса ондогон тасмаларда роль жаратып, анын чыгармачылык жолунда «Жамийла», «Маншук тууралуу ыр», «Дан даамы» жана башка чыгармалар өзгөчө орунду ээлеген. Ал СССРдин Мамлекеттик сыйлыгынын лауреаты, РСФСРдин жана Казакстандын эмгек сиңирген артисти.
Аринбасарованын Кыргызстанга келиши Чыңгыз Айтматовдун мурасы менен байланышкан өзгөчө символдук мааниге ээ. Ал жараткан Алтынайдын образы кыргыз адабияты менен кино өнөрүнүн тарыхындагы белгилүү аял образдарынын бири болуп саналат.
VI Дүйнөлүк көчмөндөр оюндары 31-августтан 6-сентябрга чейин Кыргызстанда өтөт. Актрисанын катышуусу Оюндун маданий программасындагы маанилүү окуялардын бири болмокчу.
