Экономика жана коммерция министрлигине караштуу Монополияга каршы жөнгө салуу кызматы АИ-92 бензинине берилген субсидиянын негизинде бир айдоочуга көрсөтүлүп жаткан мамлекеттик колдоонун көлөмүн эсептеп чыкты.
Учурда күйүүчү майга берилген субсидиянын өлчөмү төмөнкүдөй:
- АИ-92 бензини — 1 литрине 30,88 сом;
- дизель майы — 1 литрине 42,27 сом;
- автогаз — 1 литрине 5,38 сом.
Мамлекеттик каттоо борборунун маалыматына ылайык, Кыргызстанда 1,5 млнго жакын автотранспорт каражаты катталган. Анын 1,2 миллиондойу жеңил, 300 миңге жакыны жүк ташуучу унаалар.
Эгер айдоочу күнүнө орточо 5 литр АИ-92 бензинин керектесе, бир айда болжол менен 150 литр күйүүчү май сарптайт. Анын ар бир литрине 30,88 сомдон субсидия берилгенде, бир айдагы мамлекеттик колдоонун көлөмү 4 632 сомду түзөт.
Башкача айтканда, 150 литр × 30,88 сом = 4 632 сом.
Монополияга каршы жөнгө салуу кызматынын маалыматына караганда, мындай мамлекеттик колдоо жарандардын күйүүчү майга кеткен чыгымдарын азайтууга жана автоунааны пайдаланууга байланышкан каржылык жүктү жеңилдетүүгө багытталган.
