Бишкекте мамлекеттик органдардын кызматкерлеринин арасындагы спартакиада башталды. Мелдештин ачылыш аземи 13-октябрда Дөлөн Өмүрзаков атындагы стадиондо өттү.
Дене тарбия жана спорт мамлекеттик агенттигинин маалыматына караганда, спартакиада мамлекеттик кызматкерлер арасында сергек жашоо образын жайылтуу, спортко кызыгууну арттыруу максатында уюштурулду.
Иш-чаранын ачылышына агенттиктин директору Урмат Асанбаев катышты. Ал спартакиада көп жылдан бери өткөрүлбөй келгенин белгилеп, мындан ары мелдешти жыл сайын уюштуруу пландалып жатканын билдирди.
Катышуучулар 19-октябрга чейин спорттун беш түрү — волейбол, футзал, тогуз коргоол, шахмат жана стол тенниси боюнча мелдешет.
Спартакиада эки тайпага бөлүнүп өткөрүлөт. Биринчи тайпага укук коргоо жана аскердик органдар, экинчисине министрликтер менен башка мамлекеттик органдар кирет.
