Министрлер Кабинетинин төрагасынын орун басары Улан Маматканов өлкөдө илим жана жогорку билим берүү тармагын реформалоо боюнча жаңы артыкчылыктарды белгиледи.
Негизги максат — билим берүү системасын экономикага пайдалуу кылуу жана студенттер үчүн жеткиликтүүлүгүн камсыздоо. Бул багытта илимий изилдөөлөр практикалык жыйынтык берүүгө, ал эми университеттер эмгек рыногунун талабына жооп берген адистерди даярдоого багытталат.
Пландалган реформалардын алкагында илимий уюмдардын тармагын оптималдаштыруу жана аларды жогорку окуу жайлар менен тыгыз байланышта иштетүү каралууда. Ошондой эле жасалма интеллект, санариптик технологиялар жана инженерия сыяктуу артыкчылыктуу багыттар боюнча кадр даярдоо күчөтүлөт.
Мындан тышкары студенттик жатаканаларды курууну тездетүү жана студенттердин мобилдүүлүгүн кеңейтүү маселелери көтөрүлдү.
Өкмөт окуу акысын жогорулатпоону негизги милдет катары коюп, билим берүү кредиттерин киргизүү жана кошумча колдоо механизмдерин иштеп чыгууну пландап жатат.
