Кыргызстандын Суу ресурстары, айыл чарба жана кайра иштетүү өнөр жайы министрлиги Кыргызстан, Казакстан жана Орусиядагы негизги азык-түлүк товарларынын баалары боюнча салыштырма мониторинг жүргүздү.
Министрликтин маалыматына ылайык, Кыргызстанда акыркы байкоо мезгилинде бир катар азык-түлүк товарларынын баасы жогорулаган. Тактап айтканда, күрүч 4,4%, импорттук биринчи сорттогу буудай уну 3,6%, тазаланган күн карама майы 2,3%, каймак май 1,4%, уй жана кой этинин баасы 0,9%, ал эми кумшекер 0,4%га кымбаттаган.
Ошол эле учурда айрым азык-түлүктөрдүн баасы төмөндөгөн. Сабиз 1,0%, жергиликтүү биринчи сорттогу буудай уну жана картошка 0,8%, баш пияз 0,6%, пастерленген сүт 0,2%га арзандаган.
Казакстанда болсо мониторинг жүргүзүлгөн товарлардын басымдуу бөлүгүндө баанын төмөндөшү байкалган. Картошка 3,4%, баш пияз 2,5%, күрүч 2,2%, пастерленген сүт менен сабиз 2%, жергиликтүү биринчи сорттогу буудай уну, бөлкө нан, каймак май, уй жана кой эти 1,9%, тазаланган күн карама майы 1,7%, макарон азыктары 1,6%, тоок жумурткасы 1,4% жана кумшекер 1,1%га арзандаган.
Орусияда кумшекердин баасы гана 1,8%га өскөн. Ал эми баш пияз 2,5%, картошка 2,1%, тоок жумурткасы 1,7%, күрүч, сабиз жана каймак май 1%, биринчи сорттогу буудай уну, бөлкө нан жана пастерленген сүт 0,6%, кой эти 0,5%, тазаланган күн карама майы, уй эти жана вермишель 0,4%га арзандаганы аныкталган.
Министрлик белгилегендей, мониторинг ички жана тышкы рыноктордогу баа өзгөрүүлөрүнө туруктуу байкоо жүргүзүү жана өлкөнүн азык-түлүк коопсуздугуна талдоо жүргүзүү максатында үзгүлтүксүз жүргүзүлүп турат.
