Бишкек менен Исламабад соттолгон адамдарды өткөрүп берүү, экстрадициялоо жана укуктук жардам көрсөтүү багытында толук кандуу юридикалык базаны түзүүнү аяктады. Бул тууралуу Пакистандын премьер-министри Мухаммад Шахбаз Шарифтин Бишкекке болгон расмий сапарынын алкагында белгилүү болду.
Тараптар буга чейин, 2025-жылы соттолгон адамдарды өткөрүп берүү жөнүндө макулдашууга кол коюп, аны ратификациядан өткөрүшкөн. Бул макулдашуу эки өлкө ортосундагы кылмыш-жаза иштери боюнча эл аралык кызматташуунун негизги түркүгү болуп калды.
Ал эми 2026-жылдын 2-сентябрында болгон жолугушууда тараптар калган эки маанилүү келишимге — өткөрүп берүү (экстрадиция) жана кылмыш-жаза иштери боюнча өз ара укуктук жардам көрсөтүү макулдашууларына кол коюшту.
Жыйынтыгында Кыргызстан менен Пакистандын ортосунда соттолгондорду өткөрүп берүү, экстрадициялоо жана укуктук көмөк көрсөтүү боюнча комплекстүү келишимдик-укуктук база толугу менен калыптанды.
