2026-жылдын 15-октябрында Кыргызстандын эмгек, социалдык камсыздоо жана миграция министринин биринчи орун басары А.К. Алиасов Хорватиянын Кыргызстандагы элчиси Рефик Шабанович менен жолугушту.
Тараптар кыргызстандыктарды Хорватияда жумушка орноштуруу жана эки өлкөнүн мамлекеттик органдарынын, жеке ишке орноштуруу агенттиктеринин жана иш берүүчүлөрүнүн ортосундагы кызматташтыкты өнүктүрүү маселелерин талкуулашты.
Жолугушууда Кыргызстандын жарандарын Хорватияда мыйзамдуу, уюшкан жана коопсуз жумушка орноштуруу мүмкүнчүлүктөрүнө өзгөчө көңүл бурулду.
Кыргыз тарап Хорватиянын тиешелүү органдары менен кызматташууну жолго коюуга, өлкөнүн эмгек рыногундагы суроо-талап тууралуу маалымат алмашууга жана жеке ишке орноштуруу агенттиктеринин ишин жөнгө салуу тажрыйбасын изилдөөгө кызыкдар экенин билдирди.
Жолугушуунун жыйынтыгында тараптар эмгек миграциясы жаатындагы кызматташтыкты улантууга жана кыргызстандыктардын Хорватияда мыйзамдуу жумушка орношуу мүмкүнчүлүктөрүн кеңейтүүгө багытталган диалогду өнүктүрүүгө макул болушту.
