Кыргызстан Министрлер Кабинетинин Төрагасынын биринчи орун басары Данияр Амангелдиев 20-октябрда Тажикстандын Душанбе шаарында өткөн Шанхай кызматташтык уюмуна (ШКУ) мүчө мамлекеттердин өкмөт башчыларынын кеңешинин 25-жыйынына катышты. Жыйын тар жана кеңири курамда өттү.
Амангелдиев өз сөзүндө Бишкек саммитинин алкагында 28 документ кабыл алынып, ШКУнун институционалдык реформасы жана укуктук негиздери бекемделгенин белгиледи.
Ошондой эле соода-экономикалык жана гуманитардык кызматташтык боюнча кабыл алынган чечимдерди натыйжалуу ишке ашыруунун маанисине токтолду. Ал товар ташууну тездетүү, транспорттук чыгымдарды кыскартуу, «Кытай — Кыргызстан — Өзбекстан» темир жолунун алкагындагы биргелешкен долбоорлорду илгерилетүү жана Ысык-Көлдөгү «Тамчы» атайын финансылык-инвестициялык аймагын өнүктүрүү маселелерин белгиледи.
Мындан тышкары, ШКУнун Өнүктүрүү банкын түзүү жана жасалма интеллект жаатындагы кызматташтыкты кеңейтүү сунуштары айтылды. Амангелдиев улуу жазуучу Чыңгыз Айтматовдун 100 жылдыгына карата биргелешкен маданий иш-чараларды даярдоону да сунуштады.
Жыйындын жыйынтыгында тогуз документке кол коюлду. Алардын катарында жыйындын биргелешкен коммюникеси, 2026–2030-жылдарга карата иш-чаралар планы, ШКУнун 2027-жылга бюджети, мультимодалдык жүк ташуулар үчүн санариптик платформаны түзүү концепциясы жана өнөр жай тармагындагы инвестициялык долбоорлордун маалыматтар банкын жөнгө салган документ бар.
Ошондой эле соода-экономикалык кызматташтык программасын ишке ашыруу, 2025-жылдагы бюджеттин аткарылышы, туруктуу органдардын котормо кызматы жана кызматкерлеринин акчалай камсыздоосу боюнча чечимдер кабыл алынды.
