Пакистандын Белужистан провинциясында коопсуздук кызматкерлерин жана алардын үй-бүлөлөрүн ташып бара жаткан поездде жардыруу болду. Маалыматтарга ылайык, кырсыктан кеминде 24 адам каза болуп, 70ке жакын киши жаракат алды.
Жардыруу үчүн жоопкерчиликти Белужистан боштондук армиясы өзүнө алды. Алдын ала маалымат боюнча, жанкечти поезд Кветта шаарынан өтүп бара жаткан учурда темир жол жээгиндеги жардыргыч зат орнотулган унааны иштеткен. Окуядан кийин поезддин эки вагону оодарылып, өрттөнүп кеткен. Ошондой эле жардыруу болгон аймактагы бир катар унаалар жана имараттар жабыркаганы кабарланды.
Жергиликтүү ооруканаларда өзгөчө кырдаал режими киргизилди. Шахбаз Шариф кол салууну кескин айыптап, аны “коркоктук менен жасалган террордук акт” деп атады.
Белужистан провинциясы Ооганстан жана Иран менен чектешип, Пакистандын эң чоң жана эң жакыр аймактарынын бири болуп эсептелет. Сепаратисттик топ аймактын көз карандысыздыгы үчүн күрөшүп келет.
