Кытай Эл Республикасынын Төрагасы Си Цзиньпин Түндүк Кореяга жасаган расмий сапарынын алкагында өлкө лидери Ким Чен Ын менен жолугушуп, эки мамлекеттин ортосундагы кызматташтыкты мындан ары чыңдоо маселелерин талкуулады.
Бул Си Цзиньпиндин Түндүк Кореяга 2019-жылдан берки алгачкы сапары болуп саналат. Салтанаттуу тосуп алуу аземинен кийин эки лидер кеңири форматтагы сүйлөшүүлөрдү өткөрүштү.
Кытайдын Тышкы иштер министрлигинин маалыматына ылайык, Си Цзиньпин тараптарды стратегиялык координацияны күчөтүүгө, мамлекеттердин эгемендигин, коопсуздугун жана өнүгүү кызыкчылыктарын коргоодо биргелешип аракеттенүүгө чакырды. Ошондой эле дипломатиялык жана аскердик байланыштарды кеңейтүүнүн маанилүүлүгүн белгиледи.
Өз кезегинде Ким Чен Ын Кытай менен мамилелерди өнүктүрүү Түндүк Кореянын тышкы саясатындагы артыкчылыктуу багыттардын бири экенин билдирди.
Сүйлөшүүлөрдүн жыйынтыгында өткөн расмий кабыл алууда эки лидер жогорку деңгээлдеги өз ара сапарларды жана практикалык кызматташтыкты активдештирүү боюнча макулдашууга жетишкенин белгилешти. Ошондой эле эл аралык жана аймактык күн тартибиндеги маселелер боюнча пикир алышуу болгон.
Байкоочулардын көңүлүн бурган жагдай — жолугушууда Түндүк Кореянын өзөктүк программасы жана АКШ менен болгон мамилелер тууралуу расмий маалыматтарда сөз болгон жок. Эксперттер бул темалар сүйлөшүүлөрдүн жүрүшүндө талкууланышы мүмкүн экенин белгилешкен, бирок Кытай тарап бул боюнча маалымат тараткан эмес.
Сапар Корея жарым аралындагы коопсуздук маселелери жана Пхеньяндын өзөктүк программасы боюнча эл аралык коомчулуктун кызыгуусу күчөп турган мезгилде өттү.
