Кыргызстанда өтө турган Шанхай кызматташтык уюмунун (ШКУ) саммити өлкө үчүн маанилүү эл аралык иш-чаралардын бири. Бул тууралуу Кыргыз Республикасынын толук жана ыйгарым укуктуу элчиси, профессор Аликбек Жекшенкулов “Кыргыз Туусу” маалымат-басма үйүнө берген маегинде билдирди.
Анын айтымында, саммитти өткөрүү мамлекеттин эл аралык аброю, келечектеги өнүгүүсү жана өлкөлөр аралык кызматташтык үчүн маанилүү.
«ШКУ саммити — бул жалгыз эле бийликке эмес, жалпы элге, биздин мамлекетке, биздин келечекке керек», — деп билдирди Аликбек Жекшенкулов.
Профессор саммит өтүп жаткан күндөрү өлкөгө келген конокторду тынчтык, сабырдуулук жана ынтымак менен тосуп алуунун маанилүүлүгүн белгиледи.
«30–31-август, 1–2-сентябрь өткөнчө меймандарды тынчтык, сабырдуулук жана ынтымак менен тосуп алалы. Жөн эле сынтаканды койсок. Келечекти ойлогон жакшы ойлорду ойлоп, ийгиликтерди жаратсак», — деди ал.
Аликбек Жекшенкуловдун пикиринде, мамлекеттин ийгилиги коомдогу маанайга, адамдардын бири-бирине болгон мамилесине жана келечекке болгон ишенимине да байланыштуу.
«Менин оюмча, философия мындай: оюбуз оңолсо, ишибиз да оңолот», — деген сөзүн айтты профессор.
ШКУ саммити Кыргызстан үчүн эл аралык байланыштарды бекемдөө, өлкөнүн мүмкүнчүлүктөрүн таанытуу жана жаңы кызматташтык багыттарын кеңейтүү жагынан маанилүү аянтча болуп саналат.
