Президент Садыр Жапаров «Кыргыз Республикасынын Мамлекеттик протоколу жөнүндө» Кыргыз Республикасынын Мыйзамына кол койду.
Мыйзам 2026-жылдын 22-апрелинде Кыргыз Республикасынын Жогорку Кеңеши тарабынан кабыл алынган.
Мыйзамдын максаты болуп Кыргызстандын Мамлекеттик протоколунун негизги жоболорун колдонуудагы Конституцияга жана мыйзамдарына ылайык келтирүү, ошондой эле Мамлекеттик протоколдун жол-жоболорун өркүндөтүү болуп саналат.
Мыйзам менен төмөнкүлөр каралган:
1) Кыргыз Республикасынын Мамлекеттик протоколунун максаттары жана милдеттери;
2) Кыргыз Республикасында протоколдук иш-чараларды өткөрүү тууралуу жалпы жоболору;
3) Кыргыз Республикасында чет өлкөлүк делегациялардын сапарлары тууралуу жалпы жоболору;
4) чет мамлекеттердин элчилеринин Кыргыз Республикасынын Президентине ишеним жана кайра чакыртып алуу грамоталарын тапшыруу тартиби;
5) Кыргызстандын Өзгөчө жана Ыйгарым укуктуу элчилери тарабынан тапшыруу үчүн ишеним жана кайра чакыртып алуу грамоталарын даярдоо тартиби;
6) Мамлекеттик протоколунун жалпы жоболору (тиркеме) белгиленүүдө, аларга ылайык:
– сапарлардын мүнөзү жана форматы;
– Президенттин, Жогорку Кеңештин Төрагасынын жана Министрлер Кабинетинин Төрагасынын чет өлкөлүк сапарлары тууралуу жоболору;
– Кыргызстанга чет мамлекеттердин башчыларынын, өкмөт башчыларынын, парламенттеринин башчыларынын, тышкы саясат ведомстволорунун башчыларынын, мамлекет башчыларынын жана өкмөт башчыларынын атайын өкүлдөрүнүн сапарларынын тартиби;
– Кыргызстанга монархтардын, тактынын мураскорлорунун жана падышалардын үй-бүлөлөрүнүн башка мүчөлөрүнүн сапарларынын тартиби;
– Кыргызстандагы эл аралык уюмдардын башчыларынын сапарларынын тартиби;
– өкмөттөр аралык жана парламенттер аралык комиссиялардын жыйналыштарынын тартиби;
– Президенттин, Жогорку Кеңештин Төрагасынын же Министрлер Кабинетинин Төрагасынын өлкө боюнча иш сапарларынын тартиби;
– протоколдук иш-чаралардын тартиби жана талаптары жөнүндө башка жоболору;
7) кызмат адамдарынын протоколдук улуктугу Тышкы иштер министрлигинин сунушу боюнча Президент тарабынан бекитилет.
