Франциянын түштүгүндөгү Кань-сюр-Мер шаарында белгилүү француз сүрөтчүсү Пьер-Огюст Ренуардын музейине эки каракчы кирип, төрт көркөм чыгарманы уурдап кеткен. Алардын экөөсү качып бара жатканда түшүп калган.
Шаар мэри Брайан Массон билдиргендей, шектүүлөр шаардык видеокөзөмөл камераларына түшүп калган. Музейдеги сигнализация шейшемби күнү таңкы саат 05:48де иштеп, полиция беш мүнөттөн кийин окуя болгон жерге жеткен.
Уурдалган чыгармалардын жалпы баасы болжол менен 9 миллион евро деп бааланууда. Алардын аталышы жана башка маалыматтары азырынча ачыктала элек.
Ренуардын музейи Канны менен Ниццанын ортосунда жайгашкан Кань-сюр-Мердин негизги туристтик жайларынын бири. Ал сүрөтчү өмүрүнүн акыркы жылдарын өткөргөн үйдө 1960-жылы ачылган. Музейдин коллекциясында Ренуардын портреттери, пейзаждары, жылаңач фигуралары, жеке буюмдары жана эмеректери бар.
Бул окуя Францияда музейлердин коопсуздугуна байланыштуу тынчсыздануу күчөп турган маалга туш келди. Өткөн жылдын октябрында Лувр музейинен болжол менен 100 миллион евро бааланган сегиз искусство буюму уурдалган. Төрт шектүү кармалганы менен, уурдалган баалуулуктар азыркыга чейин табыла элек.
