Танзаниядан болжол менен 240 миллион жыл мурда жашаган байыркы жаныбардын жаңы түрүнүн калдыктары табылды. Окумуштуулар ага Dinodontosaurus isiyavamanda деген ат беришкен. Бул өсүмдүк менен азыктанган дицинодонтторго кирген жаныбар.
Табылга динозаврлардын эң алгачкы өкүлдөрү деп эсептелген айрым жаныбарлардын жашын кайра кароого себеп болушу мүмкүн. Жаңы маалыматтар Танзаниядагы айрым катмарлар мурда болжолдонгондон 10 миллион жылга чейин жашыраак болушу мүмкүн экенин көрсөтүүдө.
Кызыгы, бул жаныбардын буга чейинки ишенимдүү калдыктары Түштүк Америкадан гана табылган. Ал эми 240 миллион жыл мурун Африка менен Түштүк Америка Пангея суперконтинентинин курамында болгон. Бул табылга динозаврлардын Жердеги алгачкы тарыхын түшүнүүгө жаңы маалымат кошууда.
