Кыргызстан менен Кытайдын Цинхай провинциясы материалдык эмес маданий мурастарды сактоо, бийик тоолуу туризмди өнүктүрүү жана Улуу жибек жолунун мурастарын жайылтуу багытында өз ара аракеттенүүнү жигердештирүүдө. Өнөктөштүктүн келечегин «Кыргыз Туусу» маалымат-басма үйүнүн башкы директору Галина Байтерек менен Цинхай провинциясынын Маданият жана туризм башкармалыгынын жетекчисинин орун басары Ван Цзиньсянь жолугушуу учурунда талкуулашты.
Сүйлөшүүнүн жүрүшүндө кытай тарап салттуу кол өнөрчүлүктү сактоонун мыйзамдык коргоону, объекттерди санариптештирүүнү жана аларды туризм тармагына интеграциялоону айкалыштырган моделин тааныштырды. Кытайлык чиновниктин айтымында, санариптик архивдерди түзүүнү жана өнөрканаларды колдоону камтыган бул тажрыйбаны Кыргызстандын материалдык эмес маданий мурастарына — «Манас» эпосуна, ошондой эле шырдак, калпак жасоонун салттуу технологияларына карата колдонууга болот.
“Цинхай провинциясы менен сиздердин өлкөнү географиялык коңшулук жана маданий жакындык байланыштырып турат, ал эми Ысык-Көл облусу менен Цинхай — боордош региондор. Маданий мурастарды коргоо жана бийик тоолуу туризмди өнүктүрүү маселелеринде бизде окшоштуктар көп, биз өзүбүздүн практикалык тажрыйбабыз менен кубанычта бөлүшүүгө даярбыз”, — деди Ван Цзиньсянь.
Тараптар Цинхай жана Ысык-Көл бийик тоолуу көлдөрүнүн базасында экологиялык туризмди өнүктүрүүгө өзгөчө көңүл бурушту. Кытай регионунда катуу экологиялык экспертиза системасы жана курорттук аймактарга уруксат берилген жүктөмдү эсептөө киргизилген, бул айлана-чөйрөгө зыян келтирбестен миңдеген жергиликтүү тургундарды туризм секторуна тартууга мүмкүндүк берди.
Жолугушуунун соңунда тараптар боордоштук байланыштарды чыңдоодо ЖМКлардын маанилүү ролун баса белгилешти. Маалымат алмашуудагы маанилүү кадам катары региондордун маданий жана экономикалык дараметине арналган материалдарды «Кыргыз Туусу» гезитинин жана «Жибек жолу» журналынын баракчаларына биргелешип жарыялоо болмокчу.
“„Манас“ эпосунан Ребконг искусствосуна чейин, Ысык-Көлдөн Цинхай көлүнө чейин — Кыргызстан менен Цинхай провинциясын кызматташуунун кеңири келечеги бириктирип турат”, — деп жыйынтыктады тармактык башкармалыктын жетекчисинин орун басары.
