Европалык MPAc космостук аппараты Intuitive Machines компаниясынын IM-3 миссиясынын алкагында Айга жөнөтүлөт. Учуу Falcon 9 ракетасы менен 2027-жылга пландалууда.
Аппарат Nova-C конуучу модулу аркылуу Айдын көрүнгөн тарабындагы Рейнер Гамма аймагына жеткирилет. MPAcтын негизги бөлүгү — диаметри болжол менен 100 миллиметр болгон MoonLIGHT лазердик чагылдыргычы. Ал Жер менен Айдын ортосундагы аралыкты сантиметрлик эмес, миллиметрлик тактыкта өлчөөгө мүмкүнчүлүк бериши күтүлүүдө.
Өлчөө учурунда Жердеги обсерватория Айга лазер импульсун жөнөтөт. Чагылдыргыч жарыкты кайра Жерге багыттап, сигналдын барып-келүү убактысы аркылуу Айга чейинки аралык эсептелет.
MoonLIGHT буга чейин «Аполлон» миссиялары Айга орноткон көп сандаган майда чагылдыргычтардан айырмаланып, бир чоң чагылдыргычты колдонот. Аны Жерге так багыттоо үчүн MPAc атайын эки окутуу механизм менен жабдылган.
Жаңы технология Айдын орбитасын жана айлануусун так изилдөөгө, анын ички түзүлүшү тууралуу маалыматтарды тактоого, ошондой эле тартылуу күчүнө байланышкан фундаменталдык теорияларды текшерүүгө шарт түзөт. MoonLIGHT менен Италия, Франция, Германия жана АКШдагы жер үстүндөгү лазердик станциялар иштеши күтүлүүдө.
