12-октябрда Өзбекстандын Хива шаарында «Хива — Түрк дүйнөсүнүн жаштар борбору — 2026» жылынын расмий ачылыш аземи өттү.
Эл аралык иш-чарага Кыргызстан, Өзбекстан, Казакстан, Азербайжан жана Түркиянын өкүлдөрү катышты. Кыргызстандын делегациясы да аземге катышып, түрк мамлекеттеринин жаштарынын ортосундагы кызматташтыкты өнүктүрүү демилгелерин колдоду.
Иш-чаранын максаты — жаштар арасындагы достукту жана өз ара түшүнүшүүнү бекемдөө, маданий-гуманитардык байланыштарды кеңейтүү жана биргелешкен долбоорлорду өнүктүрүү.
Аземдин алкагында катышуучу өлкөлөрдүн өкүлдөрү жаштар саясатынын негизги багыттарын талкуулап, тажрыйба алмашты. Ошондой эле келечектеги биргелешкен долбоорлорду ишке ашыруу мүмкүнчүлүктөрү каралды.
«Хива — Түрк дүйнөсүнүн жаштар борбору — 2026» демилгеси жаштардын билим берүү, маданият, инновация жана коомдук өнүгүү тармактарындагы кызматташтыгын кеңейтүүгө багытталган.
