Министрлер кабинетинин төрагасынын орун басары Улан Маматканов БУУнун Кыргызстандагы туруктуу координатору Антье Граве менен жолугушуу өткөрдү.
Жолугушуунун жүрүшүндө тараптар Кыргызстан менен Бириккен Улуттар Уюмунун системасынын ортосундагы кызматташтыктын учурдагы абалын жана келечектеги артыкчылыктуу багыттарын талкуулашты. Өзгөчө көңүл туруктуу өнүгүү, социалдык коргоо, билим берүү, саламаттыкты сактоо жана экология тармактарындагы биргелешкен долбоорлорго бурулду.
Улан Маматканов БУУнун агенттиктери өлкөдө жүргүзүлүп жаткан реформаларды колдоого олуттуу салым кошуп жатканын белгилеп, Кыргызстан артыкчылыктуу багыттар боюнча өнөктөштүктү мындан ары да чыңдоого кызыкдар экенин билдирди.
Өз кезегинде Антье Граве БУУнун системасы Кыргызстандын туруктуу социалдык-экономикалык өнүгүүсүнө багытталган демилгелерди колдоону улантарын айтып, эки тараптуу кызматташтыкты кеңейтүүгө даяр экенин ырастады.
Жолугушуунун жыйынтыгында тараптар конструктивдүү диалогду улантуу жана биргелешкен программаларды ишке ашырууну активдештирүү ниетин билдиришти.
