“Мейкин” сыйлыгынын жобосу өзгөртүлүп, сыйлык тапшырыла турган номинациялардын саны 10го жетти. Бул тууралуу Маданият, маалымат жана жаштар саясаты министрлигинин өкүлү Зарина Калмуратова билдирди.
Жаңыланган жобого ылайык, сынакта мыкты телерадио долбоор, интернет-долбоор, жылдын мыкты подкасты, YouTube-канал жана маалыматтык-мультимедиалык долбоор сыяктуу багыттар боюнча жеңүүчүлөр аныкталат. Ар бир номинацияда бирден жеңүүчү тандалат.
Сынак 2027-жылы өтүп, жеңүүчүлөр Маалымат жана басма сөз күнүндө сыйланат. Конкурстук комиссия 11 адамдан турат. Сыйлык 2024-жылы президент Садыр Жапаровдун демилгеси менен медиа жана журналистика тармагында негизделген.
